अन्ततः माओवादी केन्द्रको स्थायी कमिटी बैठक स्थगित

16Shares

काठमाडौं । नेकपा माओवादी केन्द्रले आइतबार (आज) बोलाएको स्थायी कमिटी बैठक स्थगित भएको छ ।

बिहान ११ बजे पार्टी केन्द्रीय कार्यालय पेरिसडाँडामा बोलाएको स्थायी कमिटी बैठक स्थगित भएको हो ।

अरु राजनीतिक दलहरुसँग छलफल गर्न र केही नेताहरु काठमाडौं बाहिर भएकाले बैठक स्थगित भएको नेता नारायणकाजी श्रेष्ठले बताउनुभएको छ ।

बैठकमा वर्तमान सरकारलाई दिएको समर्थन फिर्ता र नयाँ सरकार गठनबारे छलफल हुने बताइएको थियो ।

माओवादीले समर्थन फिर्ता लिए वर्तमान सरकार अल्पमतमा पर्ने छ । त्यसपछि प्रधानमन्त्रीले संसदमा विश्वासको मत लिनुपर्छ । प्रधानमन्त्री ओलीले विश्वासको मत लिन नसके नयाँ सरकार गठनको प्रक्रिया सुरु हुने छ ।

नयाँ सरकार गठनमा अग्रसरता देखाएको माओवादी केन्द्रले आजै जनता समाजवादी पार्टी (जसपा)सँग छलफलसमेत गर्दै छ । अंकगणितको हिसाबले जसपा सत्ता गठबन्धनमा निर्णायक बनेको छ ।

जसपासहितका विपक्षी दलका नेताहरुले माओवादीले समर्थन कायमै राख्दा नयाँ सरकार गठनको बाटो अवरुद्ध भएको बताउँदै आएका छन् ।

प्रमुख प्रतिपक्षी दल नेपाली काँग्रेसको केन्द्रीय समितिको बैठकले पनि नयाँ सरकार गठनमा अग्रसरता लिने औपचारिक निर्णय गरिसकेको छ ।

 

16Shares